Erreferentzia-irizpideak

Herrialde-ikuspegia duen estrategia

Gipuzkoako etorkizuneko estrategia herrialde ikuspegitik abiatuz egingo da. Zentzu horretan, modu aktiboan sustatuko da Eusko Jaurlaritzaren irizpideen eta ikuspuntuen kontraste eta bateratze prozesua, gobernuaren bi mailen arteko lerrokatze eraikitzailea sustatzeko xedearekin.

Martxan dauden beste prozesu batzuekin bat egin nahi duen Estrategia

G+20-k, arrakasta izateko, martxan dauden beste ekimen eta prozesu batzuekin elkartzeko gai izan behar du. Erakunde forala tartean dagoen ekimenekin: Gipuzkoa Aurrera, Gipuzkoa Berritzen-Innobasque? edo Tokiko Agenda 21 prozesua, esaterako. Azken horietan, udalak buru-belarri sartuta daude, eta baita haien tokiko estrategia-bulegoak, garapen-agentziak eta mankomunitateak ere.

Tokiko eta eskualdeko ikuspegia duen estrategia

Udalak dira herritarrengandik gertuen dauden erakundeak eta hobekien ikusita daudenak. Gainera, Gipuzkoak eskualde-izaera sendoa du. G+20 prozesu estrategikoa gauzatzeko ikuspegi bateratua behar da Gipuzkoarentzat, baina herri eta eskualdeetako aniztasuna ere kontuan hartu behar da.

Martxan dauden gizarte- eta ekonomia-dinamikak, etorkizunerako sortzen diren erronkak, kapital naturala berritzeko eta babesteko erronkak... ez dira berdin ulertzen Donostialdean, Debabarrenean edo Goierrin.

Alde horretatik, kontuan hartu beharko da Gipuzkoako eskualde, herri eta hirietan hausnarketa eta plangintza estrategikoko prozesuak gauzatzen ari direla. Guztiak bateratzen eta babesten saiatuko da G+20 Estrategia. Zubiak eraikiko ditu prozesu horietara. Ez du haien lehiakide izan nahi; bildu eta sustatu egin nahi ditu.

Garapen jasangarriaren Estrategia

Lurralde Historikoko hausnarketa estrategikoa eta epe luzeko plangintza jasangarritasunaren esparru kontzeptualetik abiatuta gauzatu behar dira. Horretarako baloreei loturiko iritziak, oparotasun ekonomiko zuzen eta solidarioa -jakintzaren ekonomia, berrikuntza, garapen teknologikoa, giza kapitalaren sorrera- garapena, gizartearen kohesioa eta kapital naturalaren eta ingurumenaren babes egokia biltzen dituen garapen-eredu baten alde egin behar da.

Garapen jasangarriaren aurretiazko baldintza askatasuna, ingurumena eta giza-eskubideak sutsuki defendatzea da, eta oinarrizkoenetik hasten da, bizitzeko eskubidetik.

Garapen jasangarriak berarekin dakar oparotasun ekonomikoa zuzena eta solidarioa izatea oraingo eta etorkizuneko belaunaldiekin, benetako gizarte-kohesioa egon dadin. Kontuan hartu behar da ingurumenarekiko errespetua eta lurralde-babesa ingurumen-kalitaterako eta lurraldearen babeserako dosi altuekin batera joan behar direla.

Lan egiteko modu integratzailea ere dakar, eta horrek esan nahi du gizartearen kohesioa helburu garrantzitsua dela erakundeentzat, eta, beraz, integratzeko mekanismoak finkatuko direla gizarteko pertsona eta talde guztientzat.

Esan nahi du enplegu osoa eta kalitateko enplegua duen gizartea garatzea, lana bateragarri izan dadin aita eta ama izateak eskatzen duenarekin .

Esan nahi du gizarte ireki eta integratzaile baten aldeko aukera egiten dela, beren bizi-baldintzak hobetzera iristen diren etorkinak modu positiboan hartzen dituen gizarte baten aldeko aukera.

Azkenik, erro kulturalak babesteko eta garatzeko intentzio osoa du; batez ere, euskararen sustapena, hedapena eta erabilera, gure herriaren ondare kulturalaren elementu nagusia baita.

Gobernantzaren hobekuntzan laguntzen duen estrategia

Garapen jasangarriko eredu batek ikaskuntza kolektibora irekitako eta XXI.mendeko gizarteak agertzen dituen beharretara egokitutako erakunde publikoen beharra du. Beren zeregina inguru osasuntsu bateko pertsonentzako zerbitzu gisa ulertzen duten erakundeak. Estrategiaren jarduera aldizka ebaluatzen duten erakundeak, herritarrei ieta ingurumenari interesatzen zaizkien hobekuntzen arabera.

Kontu ematean, gardentasunean, arduran eta koherentzian oinarritzen den Gobernantza bat, gizarteko sektore guztien parte-hartze zabalean oinarritzen dena, beren etorkizuna zehaztuko duten erabakiak hartzerako orduan modu eraginkorrean parte har dezaten, lankidetza publiko eta pribaturako dinamika positiboak sor ditzaten. Gobernu-eredu aurreratua behar da, elkarrizketarako prest dagoena eta irekia, erakundeak berritzera bideratutako kapital sortzailea sortuko duen kudeaketa-eredu bat ahalbidetuko duena, zerbitzu hobea izan dezagun.

Berrikuntzaren motorra barneratzen duen Estrategia

Bizi dugun ekonomia globalak lehiakortasuna bizkortu egiten du. Nazioartean irekitzen eta garatzen diren merkatu berrien aurrean ere aukera handiak sortzen ditu.

Inguru global honetan toki egokia hartzeko, berrikuntzaren alde apustu egin behar da zentzurik zabalenean, tinko eta epe luzera. Berrikuntza teknologikoa eta antolatzailea enpresen eremuan, erakundeen berrikuntza eta berrikuntza soziala. Kapital sortzailea sustatu eta sortu behar da, pertsonen alde eta pertsonen gaitasunen alde apustu egin behar da, aldaketetara ahalik eta hoberen egokitzea ahalbidetuko diguten eremuetan birsorkuntzarako eta asmakuntzarako inguru egokiak ahalbidetzeko.

Estrategiaren erdigunean pertsonak daude

Gipuzkoak etorkizuneko erronkei aurre egiteko modurik onena da jakintzaren gizartean lehiatzeko prestatuta eta trebatuta dagoen giza kapitala izatea. Beharrezko baldintza bat da, baina ziur aski ez da nahikoa izango.G+20

G+20 estrategiaren erdigunean pertsonak daude. Gaur egun helduak diren pertsonak, baina baita hemendik 20 urtera Gipuzkoako buru izango direnak ere. Zehazki, orain 16 eta 24 urte bitartean dauden gazteak.

Lurralde Historikoarentzako proposamen egituratzaileak identifikatzeko gai den Estrategia

Estrategia honen helburua ez da informazioa sortu eta pilatzea. Ez ditu estatistikak eta dokumentuak bildu eta prozesatu nahi. Adimen-ariketa bat sustatu nahi du, probintziaren egoeraren funtsezko elementuei antzeman eta politika publikoak bideratzen laguntzeko eta gizarte zibila norabide egokian mobilizatzen laguntzeko.

Estrategiak lurralde historikoari balio handiagoa emateko, oso garrantzitsua da epe ertaineko eta luzeko jakintzak eta plangintzak laguntza ematea politika publikoak epe motzera bideratzeko.

Epe motzaren, ertainaren eta luzearen arteko ardatz nagusia indartzeko modu bat izaera estrategikoa duten zenbait programa / proiektu identifikatzea da; ekonomia-, teknologia-, lurralde-, giza, hezkuntza-, ingurumen-eremuetan eta bestelako eremuetan egituratzaileak diren programa edo proiektuak; eta gauzatzeko edo burutzeko denbora-epe handiak behar dituztenak eta jauzi kualitatibo garrantzitsua ekarriko luketenak.

Erreferentzia gisa nazioarteko esperientziez hornitzen den Estrategia

Europako zenbait herrialdetan —Finlandian, Erresuma Batuan, Suitzan, Suedian, Alemanian...— badira gobernuei loturiko estrategia-bulego edo -unitateak, beren politiketan epe luzea kontuan hartzen dutenak. Badira, era berean, hausnarketa estrategikoko prozesu parte-hartzaileak, eta baita beren lurraldeetako etorkizuneko erronkei buruz eztabaidatzen den parlamentuak ere. Esperientzia horiek identifikatu eta ikertu egingo dira, eta hala elementurik positiboenak ekarri ahal izango ditugu G+20 prozesura.

Gardentasunean oinarritzen den Estrategia

Modua mezuaren parte da. G+20-ren moduko prozesu batek irekia izan behar du, gardena, parte-hartzailea. Ondorioz, dokumenturik garrantzitsuenak gizarte-eragileen eta interesa duten herritarren eskura egongo dira. Bide errazak, atseginak eta eskuragarriak emango dira eta horien bidez interesa duen edozeinek izango du sarbidea sortzen den informaziora, hausnarketetara eta proposamenetara.

Elementu dinamiko moduan ulertzen den Estrategia, aldatzen diren baldintzetara egokitzeko denborarekin berritzen dena

Hausnarketa estrategiko bat eta epe ertain eta luzeko plangintza bat egiteak zentzua du baldin eta tresna dinamiko moduan ulertzen bada, hau da, garatzeko eta etengabe hobetzeko barne-mekanismoak jartzen bazaizkio. Epe luzeko hausnarketa batek, 20 urtera begira, erabaki estrategikoak bideratzeko balio behar du, eta erabaki horiek erakundeek eta gizarteak hartu behar dituzte. Aldian behin estrategia berrikusi eta lortu diren lorpenak ebaluatu beharko dira, eta, horretarako, jazotako gertakari eta garapenekin erkatuz eguneratu beharko dira.